Pa mas di un década, Domingos Simões Pereira i un di kes figura polítiku más destacadu na Guiné-Bissau. Tchiu pecaduris na Guiné-Bissau i na mundu interu ta consideral lider mas visionáriu di tchon desdi Amílcar Cabral, es ta kridita kuma i ten speriénsia, idukason, i kridibilidadi internasional pa transforma ka so Guiné-Bissau, ma tambi pa kumpu dizinvolvimentu i stablidadi di África Osidental.

Duranti si karrera, DSP ta difendi sempri instituisons dimokrátiku mas forti, reforma ikunómiku, idukason, kuperason rijional, i dizinvolvimentu sustentavel. Suma Purmeru-Ministru i antigu Sikritáriu Izekutivu di Comunidade de Países di Língua Portuguesa (CPLP), i ganha rispetu na kasa i na prasa internasional pa si vison i lideransa diplomátiku. Tchiu pecaduris ta odjal suma un lider kapaz di pui konfiansa torna na Guiné-Bissau, tisi invistimentus, kria upurtunidadi pa juventudi, i forsa instituisons dimokrátiku di tchon.

Ma si kaminhu polítiku markadu pa anus di konfrontu i batalias na justisa. Desdi ki Prisidenti Umaro Sissoco Embaló subi na puder, DSP fasa un seris di akuzason kriminal motivadu pa pulítika i sin provas, inkluindu akuzasons di konspirason i tentativa di golpi di stadu. Sempri i nega es akuzasons, i si adivogadus ku PAIGC ta mante kuma kes kazus i motivadu pa pulítika i es misti so tira prinsipal lider di opozison di bida públiku.

Aos, nutisias ta mustra kuma Domingos Simões Pereira kabadu di presu utra bias dipus di julgamentu na un tribunal militar. Si kipa di adivogadus kestiona ligalidadi i justisa des julgamentus, es ta papia kuma prosesu legal ka rispetadu.

Utra preukupason urgenti i si saudi. Domingos Simões Pereira ta vivi ku diabetis, un duensa ku meste kuidadu di médiku sempri. Si nutisias di si adivogadus ku si jintis mas pertu i purbadi—kuma e ka sta dal asesu diritu a tratamentu médiku nkuantu i sta presu—nton es dibi di alarma tudu pecadur ku ta kridita na dignidadi umanu i na lei. Asesu a kuidadus di saudi isensial i un diritu fundamental di kada presu, ka nporta si partidu polítiku o akuzasons ku e ta fasa.

Silensiu di kumunidadi internasional i preukupanti dimás.
Nunde ku Nason Unidas (ONU) sta?
Nunde ku Union Afrikanu (UA) sta?
Nunde ku CEDEAO sta?
Nunde ku organizasons internasional di diritus umanus sta, ku se mison i difendi dimokrasia, justisa, i dignidadi di kada ser umanu?

Diritus umanus ka pudi dpendi di pulítika. Dimokrasia ka pudi izisti si lideres di opozison ta presu tudu ora atraves di prosesus legal ku es ku se adivogadus ta papia kuma i motivadu pa pulítika. Justisa dibi di sedu indipindenti, transparenti, i aplikadu di igual manera pa tudu jinti.

Es a ka so asuntu di Domingos Simões Pereira. I asuntu di futuru di Guiné-Bissau. I asuntu di si un nason guvernadu pa lei pudi prmiti pa diferensas pulítikus risulvidu na ilisons dimokrátiku en ves di tribunais i instituisons militaris. I asuntu di pruteji diritus di kada sidadon, ka nporta si krensas pulítikus.

Istoria ta ben julga ka so kes ku ta aji, ma tambi kes ku ta fika kaladu.
Povu di Guiné-Bissau mirsi pas.
Es mirsi dimokrasia.
Es mirsi justisa.
I es mirsi lideres pa kumpiti livrimenti dianti di povu—ka pa es kaladu antis di es pudi tchik na urna di votu.